சர்வதேச மேடையில் விஜய் சேதுபதிக்கு கிடைத்த கௌரவம்... முதல் இந்திய நடிகராக புதிய சாதனை!
தமிழ் திரையுலகில் தனக்கென தனி இடத்தைப் பிடித்துள்ள நடிகர் விஜய் சேதுபதி, தற்போது சர்வதேச அளவில் இந்திய சினிமாவுக்குப் பெருமை சேர்க்கும் வகையில் புதிய சாதனை ஒன்றைப் படைக்க உள்ளார்.
அமெரிக்காவின் நியூயார்க் நகரில் வரும் நவம்பர் 23ஆம் தேதி நடைபெறவுள்ள 54வது சர்வதேச எம்மி விருது விழாவில் (International Emmy Awards 2026), விருது வழங்கும் நிகழ்ச்சியின் தொகுப்பாளர்களில் ஒருவராக விஜய் சேதுபதி பங்கேற்க உள்ளார்.
இதன் மூலம் சர்வதேச எம்மி விருது விழாவில் விருது வழங்கும் முதல் இந்திய நடிகர் என்ற பெருமையை அவர் பெற உள்ளார். தமிழ் சினிமாவைத் தாண்டி உலக அரங்கிலும் இந்திய நடிகர்களின் திறமை கவனிக்கப்படுவதற்கு இது மற்றுமொரு முக்கியமான தருணமாக அமைந்துள்ளது.
இந்த வாய்ப்பை ஏற்படுத்துவதில் சர்வதேச தொலைக்காட்சி கலை மற்றும் அறிவியல் அகாடமியின் நிர்வாகக் குழு உறுப்பினரும் தயாரிப்பாளருமான கவிதா குப்தாவுக்கு முக்கியப் பங்கு இருப்பதாகக் கூறப்படுகிறது. ஏற்கனவே 2024ஆம் ஆண்டு நடைபெற்ற 52வது சர்வதேச எம்மி விருது விழாவில் நகைச்சுவை நடிகர் விர் தாஸ் தொகுப்பாளராகப் பங்கேற்கவும் இவர் உதவியிருந்தார்.
இந்த ஆண்டு இந்தியாவிலிருந்தும் இரண்டு படைப்புகள் விருதுப் போட்டியில் இடம்பெற்றுள்ளன. விர் தாஸின் Netflix நகைச்சுவை நிகழ்ச்சியான 'Vir Das: Fool Volume' சிறந்த நகைச்சுவைத் தொடருக்கான பிரிவிலும், SonyLIV தளத்தின் 'Real Kashmir Football Club' தொடர் சிறந்த நாடகத் தொடருக்கான பிரிவிலும் பரிந்துரைக்கப்பட்டுள்ளன.
இதற்கிடையே, விஜய் சேதுபதி கடைசியாக 'பத்தா' திரைப்படத்தில் நடித்திருந்தார். அடுத்ததாக இயக்குநர் மணிரத்னத்தின் 'இஞ்சி வெள்ளம்' திரைப்படத்தில் சாய் பல்லவியுடன் இணைந்து நடிக்க உள்ளார்.
மேலும், 2024ஆம் ஆண்டு வெளியாகி ரசிகர்களிடம் நல்ல வரவேற்பைப் பெற்ற இவரது 'மகாராஜா' திரைப்படம் ஹாலிவுட்டில் ரீமேக் செய்யப்படுவதற்கான பணிகளும் நடைபெற்று வருகின்றன.
தொடர்ந்து வித்தியாசமான கதாபாத்திரங்களைத் தேர்வு செய்து நடித்து வரும் விஜய் சேதுபதிக்கு தற்போது கிடைத்துள்ள இந்த சர்வதேச அங்கீகாரம், அவரது ரசிகர்கள் மத்தியில் மகிழ்ச்சியை ஏற்படுத்தியுள்ளது. தமிழ் திரையுலகிற்கும் இது பெருமை சேர்க்கும் மற்றுமொரு தருணமாக அமைந்துள்ளது.
