“தமிழுக்கு இதைவிடப் பெரிய அவமானம் இல்லை!” – பெரியார் நூலக விவகாரத்தில் கொந்தளித்த கமல்ஹாசன்... அரசுக்கு வைத்த அதிரடி கோரிக்கை!
கோயம்புத்தூரில் அமைந்துள்ள பெரியார் அறிவுலக நூலகத்திற்குப் புத்தகங்கள் வாங்கியதில் முறைகேடுகள் நடைபெற்றுள்ளதாக எழுந்துள்ள குற்றச்சாட்டு தமிழகத்தில் பெரும் பரபரப்பை ஏற்படுத்தியுள்ளது.
இந்த விவகாரம் குறித்து எழுத்தாளர் பெருமாள் முருகன் வெளியிட்ட தகவல்கள் தற்போது விவாதத்தை ஏற்படுத்தியுள்ளன. நூலகத்திற்காக வாங்கப்பட்ட பல புத்தகங்கள் போலியானவை என்றும், குறைந்த விலையில் கிடைக்கும் புத்தகங்கள் அதிக விலைக்கு கொள்முதல் செய்யப்பட்டுள்ளதாகவும் அவர் குற்றம்சாட்டியுள்ளார்.
இந்நிலையில், இந்த விவகாரத்திற்கு நடிகரும் மக்கள் நீதி மய்யத்தின் தலைவருமான கமல்ஹாசன் கடும் கண்டனம் தெரிவித்துள்ளார்.
இதுகுறித்து தனது எக்ஸ் (X) பக்கத்தில் பதிவிட்டுள்ள அவர், போலியான புத்தகங்கள் தமிழின் வளர்ச்சிக்கு நீண்டகால பாதிப்பை ஏற்படுத்தும் என்றும், இத்தகைய செயல்களில் ஈடுபட்டவர்கள் தமிழுக்கு துரோகம் இழைத்தவர்கள் என்றும் தெரிவித்துள்ளார்.
மேலும், போலியான புத்தகங்களை அனைத்து நூலகங்களில் இருந்தும் உடனடியாகத் திரும்பப் பெற வேண்டும் என்றும், மோசடியில் ஈடுபட்ட பதிப்பகங்களுக்கு சீல் வைக்க வேண்டும் என்றும் தமிழக அரசுக்கு கோரிக்கை விடுத்துள்ளார்.
இந்த முறைகேட்டை வெளிச்சத்திற்குக் கொண்டு வந்த எழுத்தாளர் பெருமாள் முருகனுக்கும் கமல்ஹாசன் நன்றி தெரிவித்துள்ளார்.
இதற்கிடையில், இந்தப் புத்தகக் கொள்முதல் விவகாரம் தொடர்பாக விசாரணை நடத்தப்படும் என தமிழக அமைச்சர் ராஜ்மோகன் அறிவித்துள்ளார்.
தமிழ் மொழி மற்றும் இலக்கியம் தொடர்பான விவகாரத்தில் கமல்ஹாசன் வெளியிட்டுள்ள இந்தக் கடுமையான கருத்து தற்போது அரசியல் வட்டாரத்திலும் பேசுபொருளாகியுள்ளது.
