தனுஷின் ‘ஓம்’ படத்தைத் தடுக்கிறாரா தவெக எம்.எல்.ஏ? குற்றச்சாட்டுக்கு நிகிலேஷ் சூர்யா அதிரடி பதில்!
நடிகர் தனுஷ் நடிப்பில் உருவாகியுள்ள 'ஓம்' திரைப்படத்தின் திரையரங்கு வெளியீடு தொடர்பாக புதிய சர்ச்சை வெடித்துள்ளது. தமிழக வெற்றிக் கழகத்தின் சட்டமன்ற உறுப்பினரும் ரோகிணி திரையரங்க உரிமையாளருமான ரேவந்த் சரண், இப்படத்தின் வெளியீட்டைத் தடுக்க முயற்சிப்பதாக சமூக வலைத்தளங்களில் குற்றச்சாட்டுகள் பரவின. இதற்கு ரோகிணி திரையரங்க நிர்வாகி நிகிலேஷ் சூர்யா கடுமையான மறுப்பு தெரிவித்துள்ளார்.
ஓம் படத்திற்கு திரையரங்குகளில் சிக்கலா?
இயக்குநர் ராஜ்குமார் பெரியசாமி இயக்கத்தில் தனுஷ், மம்மூட்டி, சாய் பல்லவி, ஸ்ரீலீலா உள்ளிட்டோர் நடித்துள்ள திரைப்படம் 'ஓம்'.
இப்படம் நவம்பர் 20ஆம் திகதி திரையரங்குகளில் வெளியாகவுள்ளது. இதற்கான டிக்கெட் முன்பதிவு தொடங்கியுள்ள நிலையில், பல தனித்திரையரங்குகளில் முன்பதிவு இன்னும் ஆரம்பிக்கப்படவில்லை.
இதனால் படத்தின் வெளியீட்டிற்கு அரசியல் ரீதியாக அழுத்தம் கொடுக்கப்படுகிறதா என்ற விவாதம் சமூக வலைத்தளங்களில் எழுந்தது.
குற்றச்சாட்டுக்கு நிகிலேஷ் சூர்யா பதிலடி!
ரேவந்த் சரண் இப்படத்தின் வெளியீட்டைத் தடுக்க முயற்சிப்பதாகப் பரவிய தகவல்களுக்கு நிகிலேஷ் சூர்யா மறுப்பு தெரிவித்துள்ளார்.
இதுகுறித்து அவர் வெளியிட்ட பதிவில், இந்தக் குற்றச்சாட்டு முற்றிலும் ஆதாரமற்றது என்றும், பெரிய திரைப்படங்களின் வெளியீட்டின்போது வழக்கமாக நடைபெறுவது போலவே விநியோகஸ்தர்களுக்கும் திரையரங்கு உரிமையாளர்களுக்கும் இடையே பேச்சுவார்த்தைகள் நடைபெற்று வருவதாகவும் குறிப்பிட்டுள்ளார்.
மேலும், இந்த விவகாரத்திற்கும் ரேவந்த் சரணுக்கும் எந்தத் தொடர்பும் இல்லை என்றும் தெரிவித்துள்ளார்.
தனுஷ் ரசிகர்களின் விருப்பமான ரோகிணி திரையரங்கில் 'ஓம்' படத்திற்கான முன்பதிவுகளை விரைவில் தொடங்குவோம் என்றும் நம்பிக்கை வெளியிட்டுள்ளார்.
இந்நிலையில், தனுஷின் 'ஓம்' திரைப்படம் வெளியாக இன்னும் சில நாட்களே உள்ளதால், திரையரங்கு முன்பதிவுகள் மற்றும் வெளியீடு தொடர்பான அடுத்தகட்ட அறிவிப்புகளை ரசிகர்கள் எதிர்பார்த்து வருகின்றனர்.