கமிஷனர் அலுவலகத்தில் புகார் கொடுத்த நடிகர் சார்லி: காரணம் இதுதான்!
தமிழ் திரையுலகின் முன்னணி நடிகர்களான சிவாஜி கணேசன், கமல்ஹாசன், ரஜினிகாந்த், விஜயகாந்த், பிரபு, விக்ரம், அஜித், விஜய், சூர்யா என மூன்று தலைமுறை நடிகர்களுடன் இணைந்து நடித்தவர் காமெடி நடிகர் சார்லி. இவர் தற்போது திடீரென சென்னை காவல்துறை ஆணையர் அலுவலகத்தில் புகார் அளித்துள்ளது பெரும் பரபரப்பை ஏற்படுத்தி உள்ளது
இந்த புகாரில் நடிகர் சார்லி கூறியிருப்பதாவது: கடந்த 40 ஆண்டுகளுக்கு மேல் தமிழ் நாடகம், திரைப்படங்களில் நடிகராக பணியாற்றி வரும் நான், எந்த ஒரு சமூக வலைதளத்திலும் இல்லை என்பதைத் தாழ்மையுடன் தெரிவித்துக் கொள்கிறேன். என்னுடைய பெயரில் என்னுடைய அனுமதி இன்றி, இன்று ட்விட்டரில் போலியாக கணக்கு துவங்கப்பட்டு உள்ளது. இதை ஆரம்பத்திலேயே தடை செய்து நடவடிக்கை எடுக்குமாறு மிக்க பணிவன்புடன் கேட்டுக்கொள்கிறேன். தமிழக அரசின் காவல் துறைக்கு என் நன்றியும் வணக்கமும்’ என அந்த புகார் மனுவில் தெரிவித்துள்ளார்
இன்று காலை நடிகர் சார்லி பெயரில் டுவிட்டர் கணக்கு ஒன்று ஆரம்பிக்கப்பட்டது என்பதும், அதனை பலரும் ஃபாலோ செய்வதாகவும் வெளி வந்த தகவலை அடுத்து நடிகர் சார்லி இந்த புகாரை காவல்துறையில் அளித்துள்ளார் என்பது குறிப்பிடத்தக்கது.
