வைரலான புகைப்படம்... அஜித் ரசிகர்கள் ஆதங்கம்
போனி கபூர் தயாரிப்பில் அஜித் நடிப்பில் உருவாகி வரும் வலிமை படத்தின் புகைப்படங்கள் சமூக வலைத்தளத்தில் வைரலாகி வருகிறது.
அஜித் நடிப்பில் தற்போது உருவாகி வரும் படம் வலிமை. எச்.வினோத் இயக்கும் இந்தப் படத்திற்கு யுவன் ஷங்கர் ராஜா இசையமைக்கிறார். வலிமை அப்டேட்டுக்காக ஓராண்டுக்கு மேலாக காத்திருந்த ரசிகர்களுக்கு இன்ப அதிர்ச்சி கொடுக்கும் விதமாக, எந்தவித முன் அறிவிப்பும் இன்றி வலிமை படத்தின் மோஷன் போஸ்டரை இரு தினங்களுக்கு முன் படக்குழுவினர் வெளியிட்டனர்.
இந்த மோஷன் போஸ்டர் ரசிகர்களிடமிருந்து இரு விதமான விமர்சனங்கள் வந்தன. இந்நிலையில் மோஷன் போஸ்டர், யூடியூபில் 10 மில்லியன் பார்வைகளைப் பெற்றதைத் தொடர்ந்து அதற்காக சில போஸ்டர்களை படக்குழுவினர் வெளியிட்டனர்.
அவற்றைப் பார்த்த ரசிகர்கள் இந்த போஸ்டர்களை முதல் பார்வை போஸ்டர்களாக வெளியிட்டிருக்கக் கூடாதா என ஆதங்கப்பட்டுள்ளனர். பைக்கில் ஸ்டைலாக உட்கார்ந்திருக்கும் அஜித்தைப் பார்க்க ஹாலிவுட் நடிகரைப் போல இருப்பதாகவும் கருத்து தெரிவித்து வருகிறார்கள். முதல் பார்வை போஸ்டரை விட இந்த போஸ்டர் ரசிகர்களை அதிகம் கவர்ந்திருக்கிறது.
