நாரப்பாவிற்கு முன்பே வெளியாகும் தெலுங்கு திரிஷ்யம்-2
தமிழில் வெற்றிமாறன் இயக்கத்தில் தனுஷ் நடித்த அசுரன் படத்தின் தெலுங்கு ரீமேக்கில் வெங்கடேஷ் நாயகனாக நடித்துள்ளார். நாரப்பா என்று பெயரிடப்பட்டுள்ள இந்த படத்தை 2020ல் திரைக்கு கொண்டு வர திட்டமிட்டனர். ஆனால் கொரோனா தொற்றினால் தியேட்டர்கள் திறக்கப்படாததால் பின்னர் 2021க்கு மாற்றி வைத்தனர். தற்போதும் தியேட்டர்கள் திறக்கப்படாததால் நாரப்பா ரிலீசை காலவரையரையின்றி தள்ளிவைத்து விட்டனர்.
இந்தநிலையில், ஜீத்து ஜோசப் இயக்கத்தில் வெங்கடேஷ் நடித்துள்ள திரிஷ்யம்-2 தெலுங்கு ரீமேக் படத்தை தற்போது வெளியிட தயாராகி விட்டனர். மார்ச் மாதத்தில் தொடங்கி 45 நாட்களில் படப்பிடிப்பை முடித்து விட்டதால் தற்போது படம் ரிலீசுக்கு தயாராகி விட்டது. இந்நிலையில் விரைவில் திரிஷ்யம்-2 தெலுங்கு படம் அமேசானில் வெளியாக இருப்பதாக செய்திகள் வெளியாகியுள்ளன.
அதனால் திரிஷ்யம்-2 வெளியான பின்னர், தியேட்டர்கள் எப்போது திறக்கப்படுகிறதோ அப்போது தான் வெங்கடேஷின் நாரப்பா வெளியாகும் என்று தெரிய வந்துள்ளது.
