ஷில்பா ஷெட்டிக்கு ஆதரவு கொடுத்த மாதவன்: என்ன சொல்லியிருக்கின்றார் தெரியுமா?
பிரபல பாலிவுட் நடிகை ஷில்பா ஷெட்டியின் கணவர் ராஜ் குந்த்ரா சமீபத்தில் ஆபாச பட விவகாரத்தில் கைது செய்யப்பட்டு சிறையில் அடைக்கப்பட்டுள்ளார். இதனையடுத்து ஷில்பா ஷெட்டியிடமும் காவல்துறையினர் விசாரணை செய்து வருகின்றனர் என்பதும் இந்த விவகாரத்தில் அவருக்கும் தொடர்பு இருக்கிறதா என்பது குறித்து விசாரணை செய்து வருகின்றனர் என்பது குறிப்பிடத்தக்கது.
இந்த நிலையில் ஷில்பா ஷெட்டிக்கு நடிகர் மாதவன் தனது ஆதரவை தெரிவித்து சமூக வலைத்தளத்தில் பதிவு ஒன்றை செய்துள்ளார், அதில் ’எனக்கு தெரிந்து வலிமையான மனிதர்களில் நீங்களும் ஒருவர். இந்த சவாலையும் நீங்கள் கண்டிப்பாக கருணையுடனும் கண்ணியத்துடனும் வெல்வீர்கள் என்ற நம்பிக்கை எனக்கு முழுதாக உள்ளது. உங்களுக்கும் உங்கள் குடும்பத்தினருக்கும் நான் எப்போதும் பிரார்த்தனை செய்கிறேன் என்று தெரிவித்துள்ளார்.
முன்னதாக ஷில்பா ஷெட்டி நேற்று வெளியிட்ட உருக்கமாக அறிக்கை ஒன்றில், ‘கடந்த சில நாட்களாக, எல்லா விவகாரங்களும் சவாலாக இருந்தது. நிறைய வதந்திகள் மற்றும் குற்றச்சாட்டுகள் எங்கள் மீது உள்ளன. ஊடகங்கள் மற்றும் நலம் விரும்பிகளால் என் மீது நிறைய தேவையற்ற கவனம் செலுத்தப்பட்டது . எனக்கு மட்டுமல்ல என் குடும்பத்துக்கும் நிறைய கேள்விகள் எழுந்தன. இந்த வழக்கில் கருத்து கூறுவதை தவிர்க்கிறேன், எனவே தயவுசெய்து என் சார்பாக தவறான செய்திகள் வெளியிடுவதை நிறுத்துங்கள்.
நடந்து கொண்டிருக்கும் விசாரணை மும்பை போலீஸ் மற்றும் இந்திய நீதித்துறை மீது எனக்கு முழு நம்பிக்கை உள்ளது. ஒரு குடும்பமாக, நாங்கள் அனைத்து சட்ட தீர்வுகளையும் காண்போம். ஆனால், அதுவரை எனது குழந்தைகளுக்காக எங்கள் தனியுரிமையை மதிக்கும்படி, குறிப்பாக ஒரு தாயாக - நான் தாழ்மையுடன் கேட்டுக் கொள்கிறேன். மேலும் உண்மைத்தன்மையை சரிபார்க்காமல் அரைகுறையாகத் தகவல் தெரிவிப்பதைத் தவிர்க்குமாறு கேட்டுக்கொள்கிறேன்.
"நான் கடந்த 29 ஆண்டுகளாக ஒரு சட்டபூர்வமான இந்திய குடிமகனாகவும் கடின உழைப்பாளியாகவும் இருக்கிறேன். தயவுசெய்து சட்டம் அதன் போக்கில் செல்லட்டும்’ என்று தெரிவித்திருந்தார்.
